الراوي: الحاج احمد عبد الفتاح حمد مقبل.

البلد الأصلي: السنديانة المهجرة.

العمر: 78 سنة.

العنوان الحالي: حارة المنشية- مخيم نور شمس.

عمر الراوي عند حدوث النكبة: 23 سنة.

تاريخ المقابلة: 5/8/2003.

الباحثة: فداء عبد الكريم محمد زعبوط/ مخيم نور شمس.

مكان المقابلة: بيت الراوي/ حي المنشية/ مخيم نور شمس.

  

القرية...

س. حاج ما هي أشهر الحمايل والعائلات التي كانت في قريتك ؟

ج . دار نزّال كانت أشهر عائلة .

بماذا كانت تشتهر قرية السنديانة ؟

ج. بالزراعة نمرة واحد في الزراعة مفش ولا بلد يعني كانت السنديانة نمرة واحد في الزراعة . الميّ موجودة والفلاحين مهرة يعني حبة البندورة وقعت كيلوا واللي بدّوا يسمع يسمع حبة البندورة وقعت كيلوا في السنديانة .

. عمي بتقدر تسميلي أسماء جبال حارات عندكم في السنديانة ؟

ج. كان عندنا واد بقولوا له وادي الحضيرة وكانوا الناس يروحوا عليه والشباب تسبح فيه ويصيدوا سمك وفيه وادي المخاضة والست ليلى ونتذكر هناك البيادر قصص عنتر بن شداد وبني هلال وابو زيد الهلالي .

س. هل كان يوجد في السنديانة آثار, مساجد, مزارات, مقامات ؟

ج. آه كان في مسجد ما كانش الوا إسم بسكان مكتوب على الجامع فاعل الخير الحاج مرشد القاسم محفور في الحجر .ما كان في كنايس.

س. هل كان في مزارات ومقامات ؟

ج. مقام الست ليلة في الأرض البعيدة.

س. طيب ما كنتش تعرفوا مين هي الست ليلة هاي ؟

ج. مكناش نعرف يا حيّ الله الست ليلة .

س. هل كان يوجد حكواتي في بلدكم يحكي قصص ؟

ج. القصص اللي كنا نسمعها قصة ابو زيد الهلالي عنتر ابن شداد كان ييجي واحد يخرفنا ونسمع.

س. من كان ينظم هذا الحكواتي ؟

ج . هو كان واحد من نفس البلد الو هواية في القصص هايي يجتمعوا عندوا جيرانه ويصير يحكي .

س. احكيلي عن حالات الوفاة والولادة كيف كانت هاي الحالات ؟

ج. اللي كان ييجي ولد كان يروح عند المختار يسجلوا بس والمختار هو يعمل اللي بدوا اياه . الوفاة : طبعا مفش واحد ييجي وقولك أعطيني ورقة دفن وما دفن الميت الناس يجتمعوا ليعزوا لهل الميت ويقبروا على طول مفش ورقة وفاة .

س. ما هي الأحداث العامة الكبيرة التي كانت تصير في بلدتك السنديانة ؟

ج. الي صار الثورة 1936 م أخذوا ختيار جليل إسمه وسكت الشيخ محمد مقبل مش من عيلتنا أخذوا هو وإبنه وقتلوهم تحت البلد هذا حدث كبير صار بعدين هذا الحادث الأول الحادث الثاني الحاج مرشد القاسم اللي هو معروف انقتل هاي حادثين غريبات صارن في السنديانة .

س. عمي توصفلي كيف قتلوهم ؟

ما بعرف هذا كان إغتيالات كانوا يسحبوا الواحد في الليل ويقتلوا .

س. مين اللي يسحبوا ؟

ج. ما بعرفش الثوار ما بندريش عن إشي احنا ما بنقدرش نحكم عليهم بجوز الهم ثار ما بنقدرش نحكم عليهم هي الثورة أولها كانت شريفة اولها 1936م وبعدين صارت ازفت منها ثورة مفش صاروا يغتالوا بعض على اغراض شخصية واحد عندوا دين او اشي عند واحد يروح يقتلوا اول الثورة كانت شريفة كانوا يعني بندقية افرنسية ام فشكة تسقط فيها طائرة اول بعدين صارت مبتنفعش هاي الثورة اول ما قامت قامت بشرف وفيه مواقع كثيرة بين بلعا والمنطار صار اشي عمروا ما صار بين برقة وبيت امرين قتل جيش بريطاني كانوا يحاربوا كان عندنا احراج في السنديانة وفي ابريكه وفي صبارين زي ما تقولي غابات يعني فيها انمورة كانوا الثوار لما يقاتلوا الجيش البريطاني وهمي يقتلوهم يروحوا يتخبوا وين في الغابات ميبينوش يعني البارودي الالمانية او الفرنسية الفشكة يسقط فيها طائرة كانوا من قلب كان يشتغل من قلب اول بعدين خربت الثورة بالمرة .

س. شو كانت العلاقة بين ابناء قريتكم وابناء القرى المجاورة ؟

ج. اذا صار عرس في صبارين كل اهل السنديانة يروحوا غلى العرس هاي الدعوة عامة اذا صار في ام الشوف السنديانة وصبارين بتروح عليها يصير في قنير عرس تيجي اهل ام الشوف وصبارين والسنديانة مع بعض فكانت علاقة يعني قوية .

البيت...

س. أوصف منزلك في البلاد ؟

ج. ثلاث غرف , غرفة ضيافة , غرفة للعائلة , اذا كان واحد مجوزج لحالو عن ابوه .

وكانت دار للختيارة وللاولاد الصغار وكانت الدار مبنية من الدبش : السقف من خشب الادوات على الطرز الحديث وإحنا كنّافي صورة خاصة كان عندنا ادوات مطبخ كل شيء كوّيس.

س. أنواع الأدوات من ايش كانت مصنوعة: فضة, ذهب...

ج. كنّا نستعمل الطنجرة من فخّار _ فضحك هنا الحاج ثم اكمل _ كنّا اول نطبخ على الحطب نحط الطنجرة على النار ونطبخ طبيخ كوّيس على النار وبعدين تقدمت الحياة وصرنا نطبخ على بريموس ( بابور ).

س. صبّة الأرض يا حاج كيف كانت ؟

ج. صبّة الأرض يا عمي كانت من شيد احسن من صبّة وتراب ابيض مع شيد وتبيّن بيضة شيد ابيض .

ودبش مبنيّة طين وحجر ما كانش بلوك ولا صبّة يعني زي دكّة باطون زي اليوم دبّش مع طين .

س. عمّي شو مكونات الطين ؟

ج. تراب مع شويّة تبن نخلطه ونجبلوا كلوا مع الميّ والبنّا موجود يحطوا الحجر ويحط معه صرار وكنّا نقول عن الها دكّة وركّة.

العرس...

س. كيف كانوا يختاروا العريس والعروس ؟

ج. العريس والعروس ما كانوش يحكوا مع بعضهم ممنوع . أبوي يختار لي أنا عروس مثلاً خلص هاي بدك اياها مش انا أختارها لنفسي أبوي اللي يختارلي ايّاها.

س. وممنوع تحكي وممنوع تناقش ؟

ج. ممنوع لأ هو أبوي يحكي هاي العروس اللي بدك اياّها خلص انا اقبل . _ وضحك الحاج هنا _.

س. والعروس ماكانش إلها رأي ؟

ج. أبداً يشوفها شوف من بعيد أمّا يحكي معها ممنوع .

 

س. حفلة الجيزة لمّا يجوّزوا كانت وين تصير جوى داخل العيلة ؟

ج. آه طبعاً الفرح العرس يقوم داخل العيلة والعريس يركبّوا على فرس ويعملوا حفلة ويزّفوا أي نعم والنسوان حواليه والعروس تبقى في بيت أهلها بجيبوها عادي على دار العريس .

س. يعني ما بصير واحد من عيلة مقبل يعمل عرسه بره ؟

ج. لأ لازم في نفس الدار.

س. عمي توصفلنا عرس واحد من عيلتك ؟

ج. في الي ابن عم اسموا حسين الشيخ عبدى زفّوا على فرس والنسوان حواليه بعدين جابوا العروس وعملوا الفرح وكان فرح جوّا العيلة.

س. والطعام ؟

ج. العرس اليوم فيه كهربا واحنا ما كان في كهربا كانوا يجيبوا حزم حطب ويوقدوا النار ويعملوا العرس ويجيبوا حدا ويسحجّوا على الحطب.

س. ما هي نوع الملابس للعريس والعروس ؟

ج. العريس : قمباز يعني دماية وحطّة وعقال .

العروس : حطة مشرشبة ويحطوا في القراميل تبعها يعني مع الشعر ذهب.

س. مين كان يحطّوا ؟

ج. العريس عشان يبقى على ظهرالعروس وذنيها وبايدها اساور. والحفلات كانت رز ولبن.

س. بيذبحوا غنم ؟

ج. طبعا ًبيذبحوا خرفان . حفلاتنا كانت أحسن من اليوم بيذبح الواحد عشر ذبايح وكلوا لحم ولبن.

الأحداث...

 

س. ماذا حدث بين بلعا والمنطار ومين شارك في الحدث اللي صار ؟

ج. صارت معركة كبيرة وانقتل فيها انجليز كثير وشارك فيها الثوار بعدين في ببرقة وبيت امرين صار اشي غريب بعدين عندك القسطل قضاء القدس صار اشي غريب انقتل انجليز كثير .

س. القسطل صارت في القدس طيب مين كان قائدها ؟

ج. القواد احنا ما بنعرفهمش بنعرف انها ثورة هسا احنا كان عندنا مثلا في السنديانة كانت فصائل كل فصيلة بيجي (10) او (12) واحد الفصيلة في السنديانة كان المسؤول عنها صبري الحمد عصفور في قنبر قائد الفصيلة صالح عبد المالك في صبارين قائد الفصيلة ابراهيم الخوجة والقائد العام لكل الفصائل ابو درة ابو العبد من سيلة الحارثية الشعراوية والساحل انا ما بعرفش القوات انا قلتلك عن المنطقة اللي انا كنت فيها الي هي منطقة الروحة . هاي المنطقة اللي كنت فيها شرطي في كان منطقة الساحل الشعراوية في وادي الشعير وجبل النار فيه لواء السامرة هاي ما بنعرفش عنها اشي بنعرف عن المنطقة اللي احنا فيها يعني اللي ذكرته عن المنطقة اللي احنا فيها هي منطقة الروحة هاي اللي انا بعرفه صبارين السنديانة قنير وابريكه هاي ابريكه كانت مش مشرفة على زمارين كانت قريبة من زمارين .

س. هل خفتوا من خسارة اراضيكم ومنازلكم ؟

ج. يعني لما واحد يفارق ارضه مسقط راسه وبدوا يضلوا ساغ يعني مفش عقلوا بيتخرفتش طبعا لما كل واحد يفقد ارضه ووطنه يعني ضحينا بايش كل التضحية ضحيناها لحتى نسترد وطنا مقدرناش ليش لانوا الدول العربية ما كانت معانا يعني في 1948 م اجا جيش الانقاذ لما هاجرنا من البلاد ووصل لحد حيفا ونوري السعيد وعبدالإله قالوا ماكوا ماكوا ارجعوا يعني كانت مؤامرة أخذ فلسطين مؤامرة .

س. يعني العرب الهم يد في الموضوع ؟

ج. طبعا يعني العراقيين ساس البلى كانوا بدهم يدخلوا حيفااجت اوامر من نوري السعي وعبد الإله ارجعوا كان 1967 م انا بذكر كنت حلاق في طولكرم 11 سنة اجا واحد ابو رقيبة اجا خطب خطاب في البلدية قال يا جماعة اسرائيل ما تقتلهمش مش اللي بتقاتل فيكم اسرائيل بل امريكا صاروا الناس يسبوا عليه مع العلم هوي صادق اللي قام في الحرب كلها امريكا .

س. كيف حكمت بريطانيا فلسطين ؟

ج. ايام الثورة الانجليز كان يعاملنا معاملة قاسية جدا كانوا ييجوا يطلعوا الرجال و الشباب لحال والنساء والاطفال لحال ويفوت يخرب يدير الزيت على الطحين والقمح على الشعير وكانوا يخربوا خراب وعركسوا كثير علينا الثورة يعني عملت عمل مش كويس عملت بريطانيا عمل مش كويس خاصة مع الاسلام مع اليهود لأ اليهود صداقة معهم .

س. هل كانت مجموعات تتعامل مع البريطانيين سياسيا جواسيس يعني ؟

ج. لا بد الا فيه جواسيس والجواسيس موجودة على زمن تركيا حتى واللي كسر تركيا الجواسيس تبعون العرب برضوا وتركيا دولة عربية عثمانية اسلامية كانت اليهود ما تسترجي تحط مبركية لأنها أرض اسلام هاي مش ارض يهود اما بريطانيا عملت عمايلها .

س. عمي شو رأيك بالحاج امين الحسيني وعز الدين القسام ؟

ج. اللي بنسمعوا عنوا انوا كان جاسوس لأنه كان خاين ليه ؟ لأنه لما كان تقسيم فلسطين في1947م مبدهوش راح يقلوا انجليزي اسما بريغادير راح قلوا يا حاج متقبلش هذي فلسطين للإسلام تردش على اليهود هذا بعرقل المصلحة فصاروا الناس يصفقوا ويقولوا سيف الحاج امين , ما قبلش بس همي الهم هدف فيها بريطانيا الهم الهدف انوا مشن يمسحوا هاي الدولة . وعز الدين القسام يعني كان في معركة القسطل وهذا مشهور زمان زمان الكل كان يقدروا والكل كان يقدسوا عز الدين القسام كان في موقعة القسطل يعني قتل من الانجليز الله اعلم قديش .

س. الزعماء الفلسطينيين عملوا بشكل كافي في هذيك الفترة ام قصروا ؟

ج. المعروفي في هذا الوقت لو مهما يقولوا يعني في خوف يعني حديثهم لا يقال انمحى لانوا في كثير جواسيس في هذاك الوقت واللي خرب فلسطين الخيانة خانتها العراق العراقيين خانوا اكثر خيانة اجى جيش الانقاذ ووصل حيفا لو ما اجتهم اوامر يرجعوا انكان اخذوا فلسطين من زمان .

النكبة، اللجوء والتهجير...

 

س. هل تذكر تاريخ الهجوم الذي تعرضت له قرية السنديانة ولأول مرة ؟

ج. لما صار لأول مرة لما اجوا على إبريكة ونسفوا إبريكة نسف وقتلوا فيها هاي يعني في آخر 1948م في آخر مرحلة بين1947م _1948م واجوا على السنديانة لا وصلوا السنديانة احنا هربنا .

س. ما الحدث اللي صار بين شهر (12/1947م) و (5/1948م) ؟

ج. اليهود هجموا على دير ياسين هذا اللي بعرفوا انا هجموا على دير ياسين وقتلوا الاطفال والنسء وكان إشي فظيع جدا .

س. بتذكر اليوم اللي رحلتوا او هاجرتوا فيه ؟

ج. لأ ما بتذكرش التاريخ المهم في ال 1948م كان اول الحصيد يعني لسه المواسم ما اخذناها يعني كان الموسم النا وكان الزرع تقريبا بدوا حصيدة .

س. كيف كانت الظروف اللي كانت المحيطة ؟

ج. والله كانت الظروف صعبة طبعا الواحد ما اخذش اشي معاه لا موسموا واستفاد منه ولا مال وينفق على حالوا بس الواحد اخذلوا فرشة ومباطنية ولحاف وطلع هذا هو ليش لإنا حسبنا حساب إنوا نرجع ما حسبناش حساب إنا نظل (53) سنة حسبنا حساب انا نرجع على البلاد اسبوع اسبوعين كلنا آخريتنا بنرجع على البلاد .

س. هل اعتدوا على الناس وهموا طالعين ؟

ج . احنا خفنا بس آخر إشي على العرض حافظنا على العرض قبل الأرض قلنا بيجوز ييجوا يعتدوا على البنات هذا اللي خفنا منه احنا ضحينا في كل إشي إتجاه إنا نحمي العرض .

س. القرى اللي كانت مجاورة الكم هاجرت قبلكم ولا انتوا تأثرتوا فيها فهاجرتوا ؟

ج. احنا طبعا لما تهاجر اول بلد هسا صبارين أكبر بلد في الروحة لما صبارين طبعا تطلع احنا إطلعنا وإم الشوف وقنير وكلنا مهوا كلوا بحد بعضوا وهاجرنا لما البلد الكبيرة حيفا سقطت طبعا احنا بدنا نطلع .

س. إتأثرتوا في المذابح اللي صارت فهاجرتوا من خلال هاي المذابح ؟

ج. طبعا مهي كانت هاي عصابات إرهابية كلاب مثل عصابة شتيرن والأرغون والهاغانا هاي ثلالث عصابات ارهابية غدارين وعاطلين .

س. كان في حكي بينكم وبين عيلتكم عن الهجرة انكم بدكم اتهاجروا وكيف كان تخطيطكم للهجرة ؟

ج. حسبنا حساب انوا بعد اسبوع راجعين احنا أخذنا إشي بسيط معنا يعني رايحين نوخذ إسرائيل ويحتلوها العراقيين والعراقيين كلاب واجا مختار زمارين (يهودي ) اجا على مختار السنديانة قلوا يا عمي ابو الاديب لا تروحوا ولا تيجوا والناس ما صدقوش هالحكي وبدوا يطلعوا أول بأول فالمختار طلع وراهم .

س. كل السكان طلعوا ولا ظل حدا ؟

ج. لأ كل الناس طلعوا .

س. ما اخذتوش نصائح من القوات الفلسطينية اللي كانت او القوات السياسية قبل ما تهاجروا ؟

ج. لأ وكنا نخمن انوا عهذا اشي بسيط اكم يوم وراجعين.

س. اخذتوا معكم وثائق شهادات كواشين ؟

ج. انا لأ ما اخذت اشي اللي طلعت معي الهوية الفلسطينية ولحد الآن موجودة .

س. كيف اطلعتوا من قريتكم مشيا على الأقدام ولا على الحيوانات ؟

ج. الوا عندوا دابة حط عليها أغراضه ولي ما عندوا حمل فرشتوا على ظهروا وطلع .

س. لوين قررتوا تروحوا ؟

ج. لا بد إلا كل واحد الوا قرايب أنا اللي نسايبي في بلعا مرتي أم العبد من بلعا أبوي أجا على زيتا إلنا قرايب في زيتا قعد اشوي وانتقل على طولكرم وبعدين على عمان إخوتي هسا بعمان .

س. يعني كل العائلة طلعت ؟

ج. آه الكل طلعنا كلنا مع بعض.

س. اطلعتوا مع بعض من السنديانة وين انفصلتوا عن بعض ؟

ج. ابوي راح على زيتا وانا بقيت متجوز واتحيزت لنسايبي .

س. بتعرف حالياً وين بيتواجدوا ؟

ج. آه بعرف إشي في الزرقاء وإشي في جرش وفي إربد وفي عمان .

س. بتذكرش عيلات ضيعت أولادها طوال الرحلة ؟

ج. بعرفش . بس في ثلاث إستشهدوا من السنديانة واحناوطالعين وهذول قتلوهم اليهود وهمي : كامل عابودي , وصبري محمود , وأحمد .

س. ما كان في مقاومة طوال الطريق ؟

ج. لأ .

س. احكيلي عمي من ساعة ما هاجرتوا لحد ما وصلتوا المخيم ؟

ج. اول ما هاجرنا جيت أنا عند نسايبنا في بلعا من دار حمدان قعدنا في خشة طبعا مكنش عندي ولاد إلا بنت من المرة الأولى طيب استأجرت محل من دار الأوقاف وفتحت محل حلاقة وشتغلت حوالي سنتين ثلاث خلفنا بنات ثنتين وولد في بلعا وبعدين صارت الناس ايتروح على الكويت وعلىالعراق احسن إلي قعدت سنتين لحالي من بعد بعد السنتين اخذت أم الولاد وسافرت وقعدنا أخرى خمس سنين يعني سبع سنوات في بغداد جينا من بغداد في الستينات جيت على طولكرم وقعدت في محل صالون النهضة (سليم أحمد أبو بكر) الله يرحموا (11) سنة في صالون الحلاقة في طولكرم من بعدها قللي مدير المخيم هون في نور شمس يا أبو العبد انتا موخذ هناك دار بالإيجار متيجي هون وتقعد ببلاش فأنا وافقتوا وجيت فعلاً وبنيت دار على حسابي في نور شمس وقعدنا في نور شمس وقعدت حلاق فيها حوالي (20) سنة .

الحنين...

س. مفاتيح الدار لسا معك ؟

ج. آه معي موجودات.

س. هل السنديانة موجودة للآن أم دمرت ؟

ج. إدمرت بالمرة أما الأرض لسا موجودة وزرتها ورحت عليها .

س. كيف كان شعورك ؟

ج. شعوري هوي الواحد يبكي ولا شو يسوي عليها يعني أعصابنا منهارة لما يشوفوا داروا مهدودة وأرضوا راحت يعني مآسي إدمرت كلياتها ما ظلش من معالمها إشي .

س. هل تتمسك في العودة لبلدك والرجوع لبلادكم ولدياركم ؟

ج أتأمل لو أرجع على السنديانة حتى لو أقعد تحت شجرة .

س. لو عرضوا تطلع على بلد ثالث غير السنديانة ونور شمس ؟

ج. غير السنديانة ما بقبلش .

س. ما هو شعورك بعد أكثر من (55) من معاناة اللجوء ؟

ج بقول لا حول ولا قوة إلا بالله مني آخر وقت في عمري.

س. لما يقعدوا أولادك وأحفادك حواليك شو الذكريات اللي بتحب اتوصلها الهم من خلال تجربتك ؟

ج. بحكيلهم الواقع اللي صار معاي طبعا .

انتهى...